Fundashon Prinses Wilhelmina Fonds a wòrdu fundá dia 16 di novèmber 1949 ku e meta pa kombatí kanser den e sentido di mas ámplio di e palabra. E Fundashon ta finansieramente dependiente di donatornan i no ta haña supsidio di gobièrnu.
Pa por kumpli ku su meta, PWF ta traha na 5 diferente manera:
- PWF ta duna guia i sostén na pashèntnan di kanser ku ta inskribí na e fundashon
- PWF ta duna guia i sostén na miembronan di famia serkano di pashèntnan di kanser ku ta inskribí na e fundashon;
- PWF ta stimulá i realisá programanan di informashon tokante di kanser;
- PWF ta stimulá i sostené otro organisashonnan i fundashonnan ku ta duna aporte na e meta di PWF;
- PWF ta duna aporte na investigashónnan tokante di kanser;
1. Guia i sostén na pashèntnan di kanser
Unabes miembro di e fundashon, miembronan por partisipá na seshonnan di informashon, nan por hiba kombersashonnan ku trahadónan sosial i por rekohé protésis di pechu, BH, peluka i otro suplementonan na PWF. Aparte di esei tin aktividatnan diario pa miembronan organisá pa e “Departamento Terapía i Rekreashon”. Tambe ta parti paketenan di alimento pa pashèntnan durante di e periodo di kimoterapia i radioterapia i PWF ta organisá eventonan sosial pa e pashèntnan.
Guia i sostén na miembronan di famia serkano
Famianan por pidi yudansa siko-sosial, ku trahadónan sosial di PWF ta ofresé.