Historia

Historia di e fundashon

Historia di Fundashon Prines Wilhelmina Fonds entre 1949 pa 2014

  • 1949

    Fundamentu di Fundashon Prinses Wilhelminafonds i e bataya kontra di kanser

    Tempu ku Reina Wilhemina a kumpli su di 50 aniversario komo Reina di Reino Hulandes, a kolekta sèn na tur e íslanan (ku despues lo a forma Antias Hulandes) pa asina por hasi un regalo na Reina Wilhelmina.

    Na tur a kolektá un suma di 6.371.60 florin. E ora ei Reina Wilhelmina a duna pèrmit pa usa e suma aki pa lanta un fundashon ku lo karga su nòmber i ku lo tin komo meta ofresé tratamentunan médiko na pashèntnan di kanser di menos rekurso. Debí ku despues di a baha for e Reinado ela haña e titulo di ‘Prinsesa’, a yama e fundashon na Korsou Prinses Wilhelmina Fonds.

    Riba 16 di novèmber 1949 e fundashon a wòrdu fundá pa notario J.Boesveld. E akto a keda firmá pa e sigiente personanan: mw. G.M.Peters-Witkam (presidente), mw. Dr. E.M. Fraenkel-Nieuwstraten (visa presidente), mw. L.M.A. Arends-Savelkoul (sekretario), mw. C.F.P. Schoorl-Straub (2e sekretario), en mw. S. Alvares Correa-Maduro (tesorero).

    E Dámanan ku tabata kasá i ku mester a firma e akto aki, mester a entregá un pèrmit por eskrito di nan kasá, mirando ku e tempu ei hende muhénan no tabata outorisá pa firma independientemente (handelingsonbekwaamheid van de vrouw).
    Gouverneur L.A.H.Peters A bira e protektor di e fundashon.

    E promé komité ku a kolektá pa e pashèntnan di kanser. Tur ku koperá ku un sumo mínimo di 25 sèn, ta haña un streki ku e ‘rood, wit blauw’.

  • 1951

    Gobernador ta bira protektor i su kasá ta bira miembro di honor

    E hunta di direktiva di PWF tabata di opinion ku e kasá di Gobernador no por ta un miembro meskos ku tur e otro dámanan i a disidí di nombr’é komo miembro di honor i gobernador komo protektor.

    Señora T.Struycken-Feldbrugge, kasá di gobernador Struycken, a keda nombrá komo presidente di honor di Prinses Wilheminafonds.
    PWF ta sòru tambe pa sostén na e otro paísnan di Antias.

    Mw. T. Struycken-Feldbrugge, echtgenote van gouverneur Struycken, wordt benoemd tot erevoorzitter van het Prinses Wilhelminafonds.

    Het PWF zorgt ook voor ondersteuning op de andere Antilliaanse eilanden.

  • 1952

    E desaroyo di radioterapia

    For di aña 1900 ta usa radioterapia den tratamentunan di kanser. PWF a paga un aparato ‘Orthovolt’ ku ta usa pa ‘röntgenbestraling’ pa hospital St.Elisabeth. E aparto aki lo keda kasi 20 aña den servisio.

  • 1953

    Ta instalá un komishon médiko .

    E komishon médiko ku ta konsistí di dr. H.van Raale, dr. J.de Windt i dr. A.Pieron ta evaluá petishónnan di ayudo ku ta drenta na PWF.

  • 1954

    E promé protésis di pia

    Pa promé biaha un pashènt, ku pa motibu di kanser mester a amputá un pia, ta haña un protésis di pia.

  • 1955

    Reina Juliana ta bishitá Korsou

    Reina Juliana ta bishitá Korsou i PWF huntu ku Prins Bernhardfonds ta sòru pa un regalo Nashonal

  • 1956

    promé Presidente Kurasoleño

    Señora Alvares Correa-Maduro ta bira e promé Presidente di PWF Kurasoleño

  • 1957

    PWF ta risibí regalo di Reina Juliana

    Reina Juliana ta regalá PWF e suma ku ela risibí na okashon di su bishita na Antias i Sürnam. KLM ta duna PWF pèrmit pa por kolektá sèn na Hato na momentu ku tin buelonan for di Hulanda. E skol Maria Immaculata Lyceum ta hasi donashon di 25% na PWF di e entrada generá pa un teatro ku e skol a organisá.

  • 1958

    E promé inyekshon di radium

    Dr. W.P. Maal ta konsehá PWF pa kumpra algun angua pa inyekshon di radium pa por trata kanser kun’é.

  • 1960

    Eerstedag envelop

    Pa konmemorá e di 10 aniversario di PWF a saka un stampia (eerstedag envelop) ku imágennan di bida bou di laman i piskánan. E potrètnan aki ta di Fred Fischer.

  • 1962

    Luna di kolèkt

    Pa por kolektá fondo a saka un buki di potrètnan pretu ku blanku saká pa e siruhano dr. Hugenholtz.

    Presidente di PWF señora Correa ta inisiá e tradishon pa invitá tur e dámanan ku ta yuda ku e kolèkt pa bin bebe te serka dje i alabes nan ta haña nan lista i buzon di kolèkt. E dámanan ku keda invitá ta konsiderá e echo ku nan ta yuda ku e kolèkt un honor grandi. E barionan kaminda tabata kolektá ta Punda, Otrobanda, Breedestraat, Roodeweg, Saliña, Mahaai, Buena Vista. Dòkternan i dentístanan tabata wòrdu aserká apart i miembronan di hunta di direktiva tabata kolektá na misanan i na skolnan.

  • 1963

    Kluis speshal pa angua

    Huntu ku Shell Curaçao n.v. e Fonds ta kumpra un kluis pa por warda e anguanan di radium. E anguanan aki tabata wòrdu usá na momentu ku tabata hasi tratamentunan di ‘bestraling’ na hospital.

  • 1964-1970

    Pa motibu di inundashon kousá pa Tomas, no tin datos disponibel pa e periodo aki. Hopi dokumento a bai pèrdí e tempu aki.

  • 1972

    kolèkt pa un aparato ‘Kobalt’

    Ta keda anunsiá ku e kolekta anual lo wòrdu usá pa kumpra un aparato ‘Kobalt’ pa usa pa ‘bestraling’ na Korsou.

    E pintor Venezolano sra. Guela ta pone 10% di e entradanan di su eksposishon disponíbel na PWF. Tambe e ta hasi un regalo na PWF dor di duna un di su pinturanan pa por organisá un rifa kun’é.

  • 1973

    American Line ta hasi un donashon pa por kumpra un aparato ‘Kobalt’

    Na okashon di su di 100 aniversario, Holland American Line ta hasi un donashon di un suma pa por kumpra un aparato ‘Kobalt’.
    PWF ta deskubrí ku famianan di fayesidonan ta stòrt sèn riba kuenta di e Fundashon. Ta pidi pa enbes di manda flor, hasi donashon na PWF.

  • 1976

    Gastroscoop i Colonoscoop pa Hospital

    Gastroscoop i Colonoscoop pa hospital.
    E poliklínika nobo di hospital a habri i PWF huntu ku Fundashon ‘Comité van de Zomerpostzegels’ ta regalá un gastroscoop i colonoscoop na hospital pa por hasi e.o. tèstnan di tripa.

  • 1977

    promé simposio tokante di kanser

    E promé simposio na Korsou tokante di kanser a keda presentá den hospital st. Elisabeth. DR. P.Ackerman ta kordiná e konferensha. Dr. R.Vera ta fungi komo presidente mientras diferente otro dòkternan di Klínika La Floresta ta hasi presentashon. Tur Profesor a studia na Universidatnan Merikano. Tópikonan ku a keda trata durante di e simposio ta: kanser di pechu, sirugia, patología, radioterapia, kimoterapia modèrno i e ròl di sirugia neurológiko i medisina nuklear den tratamentu di kanser.

  • 1978

    Introduskhon di e programa ‘Rèk i alkansá bo rekuperashon’ (Reach to Recovery)

    E programa ‘Rèk i alkansá bo rekuperashon’ ta wòrdu introdusí. E ta un tradukshon di e buki i programa di e Asosiashon di kanser American Cancer Society (ACS) ‘Reach to Recovery’ di Therese Lasser. E buki ta speshal pa hende muhénan ku a amputá pechu. Pashèntnan ku a haña guia pa medio di e programa aki, ta haña un tas ku un bala sòft aden, un pida kabuya, un kusinchi i un protésis di pechu.Un boluntario ta splika e pashènt kon e por usa e obhetonan aki na momentu ku e ke hasi e tareanan ku e buki ta menshoná. Pa un kampaña kontra di humamentu R.Schotborg ta diseñá un poster ku pinturanan bunita ku ta ilustrá 12 otro kos ku bo por hasi enbes di huma. Abase di konseho di dr. A.Saleh PWF ta regalá Hospital un endoscoop.

  • 1979

    Publikashon di e promé folder na Papiamentu

    E promé folder na Papiamentu, den kua ta mustra e síntomanan ku por indiká kanser, a keda publiká. E informashon ta aplikabel pa hende muhé i hende hòmber.
    Dr. A.Saleh, konsehero médiko di PWF, ta kosehá pa regalá hospital St.Elisabeth diferente aparatonan ‘laparoscopie’, pa asina pa medio di ferdof mes por hasi operashonnan chiki pa tuma muestra di sélula. Na e manera aki lo por prevení un operashon grandi. Ku e aparato menshoná por hasi tèst na e.o. igra, stoma, tripa i ovario.
    PWF ta kumpra e sine ‘How to examine your breasts’ di e asosiashon merikano American Cancer Society. E teksto ta keda tradusí i ta keda pasá na Teleçuracao despues di 10 or di mainta.

  • 1980

    Luna di kolèkt sèptèmber

    Pa promé biaha e kolèkt ta keda hasi den luna di sèptèmber. Ku esaki ta kibra ku e kustumber di tene e kolèkt den lunda di aprel.
    PWF ta regalá un ‘ultrasound’ na hospital. Esaki ta un aparato basá riba un tratamentu no-invasivo kaminda abase di ólana di zonido ta investigá diferente órgano di e kurpa humano.

  • 1981

    Prothese bank

    Het PWF start een prothesebank met een donatie ontvangen van de groep ‘the theater players’ die onder leiding van H.J. Broesterhuyzen het toneelstuk ‘Meneer Masure’ opvoerde.
    Een bewustmakingscampagne tegen roken wordt door het PWF gelanceerd via radio en televisie met medewerking van mw. Stella Oosterhof en dhr. Eddy Waas die de bekende poster ontwierp waarop een skelet staat afgebeeld met een sigaret in de mond en de tekst: “djis sigui huma…” (blijf maar roken…).

  • 1981

    Banko di Protésis

    PWF ta habri un banko di Protésis ku donashon di e grupo ‘The theater players’ ku, bou di guia di H.J. Broesterhuyzen, a dirigí e obra teatral ‘Meneer Masure’. Un kampaña di konsientisashon kontra di humamente ta keda lansá pa PWF via di radio i televishon ku yudansa di sra. Stella Oosterhof i sr. Eddy Waas, kual a diseñá e poster famoso riba kua por mira un skelèt ku un sigaria den su boka i e teksto: “djis sigui huma…”

  • 1982

    promé grupo di terapia

    Pa promé biaha ta organisá un grupo di terapia pa pashèntan ku a pasa den e proseso di un mastectomie (amputashon di pechu). E seshon ta bou di guia di un sikólogo i un trahadó sosial.

    A tene un simposio na Universidat di Korsou (UNA) kaminda diferente profeshonal lokal di diferente disiplina a partisipá. Ta trata di p.e: un siruhano, un internista, un trahadó sosial, dos sikólogo, un dòkter di kas i un pashènt.
    Dr. Robi Rojer ta sostené e organisashon di e simposio aki. Dr. Robi Rojer ta spònsor na nomber di Kentucky Fried Chicken e promé ‘speurtocht’ den Punda, organisá pa dr. E.Waas, kaminda 600 mucha por partisipá. Dr. A. Saleh a start ku un serie di charla pa gruponan spesífiko den algun sentro di bario.

  • 1983

    Aparato ‘Kobalt’ pa radioterapia na Hospital

    Hospital ta haña un aparato ‘Kobalt’ pa tratamentunan di radioterapia di regalo pa un suma simbóliko di 1 florin serka e grupo ICC (international Career Center) i sr. Beagleman. E grupo Merikano aki ke habri un sentro di kanser na Korsou.
    Na komienso di aña ta organisá un simposio ku e título ‘Modern concepts in the treatment of early breast cancer’ ku partisipashon di dos Profesor di Yale: dr. L. Faber i dr. E. Wolff i tambe dr. J. Vermeij for di Groningen. Diferente siruhano i radiólogo di instituto La Floresta tambe ta partisipá na e konferensha. Dr. R. Vera ta fungi komo moderador. Den e konferensha ta papia tokante di e benefisionan i desbentahanan di amputashon di pechu i di kitamentu di tubérkulonan ora esakinan ta chikitu ahinda.
    PWF ta regalá un instalashon di músika na e Departamento di Onkologia di Hospital, algun stul konfortable di e tipo ‘lazy boy’ pa tratamentu di kimoterapia i tambe ‘gelcaps’ den espera di e aparto di radioterapia.
    Den kolaborashon ku Sedreko i Kentucky Friend Chicken e evento ‘Kana i kore kontra di kanser’ a keda organisá. Curaçaose Atletiek Bond ta organisá un ‘speurtocht’ ‘kana buska gana’ ku partisipashon di 530 mucha.

  • 1984

    Un edifisio propio pa PWF

    PWF ta habri un sentro di informashon na Scharlooweg 52. E kas ta di Shon Joonchi di maduro & Curiel’s bank ku ta hür na PWF pa un suma di 1 florin pa aña. E kostonan di awa i koriente tambe MCB ta karga.
    PWF ta kompartí e edifisio ku Fundashon Raoul Römer.
    Mamita fox ta organisá un teleton pa rekoudá fondo pa por kumpra un simulador ku tin mester pa e aparato di ‘kobalt’ por funshoná.
    Ta duna kurso na e penúltimo klasnan di tur skol na Korsou tokante di e 7 síntomanan ku por indiká kanser i kon pa prevení nan. E boluntarionan ta bishita 33 skol. Ku kolaborashon ku dr. R. Rojer, konsehero di PWF, ta publiká un buki ‘Kimoterapia i abo’. E buki ta un guia pa splika e pashènt i su famia kiko pa spera na momentu un persona ta haña tratamentu di kimoterapia.

  • 1985

    promé tratamentu di radioterapia

    E promé pashènt ta haña tratamentu di radioterapia. Dr. G.Kok ta bini Korsou pa un periodo pa por establesé e departamento i pa por duna guia. E departamento a kuminsa ku 2 laborante, W. Lont en J. Wansing, H. Martina (fysicus) i en sekretaria O. Rademaker

  • 1987

    PWF ta regalá un aparato ‘lymphapress’ na hospital

    Ta kumpra 4 aparato ‘Lymphapress’ pa e Departamento Onkología pa asina asistí pashèntnan di ‘oedemvorming’ den brasa.

  • 1989

    40 aña PWF

    E Fonds ta organisá dos simposio na okashon di su di 40 aniversario. E promé simposio ta karga e título ‘Nieuwe Ontwikkelingen op het gebied van pijnbestrijding bij kanker’. Den e simposio ta trata e pregunta komplekso di kombatimentu di doló serka pashèntnan di kanser i e manera di mas efektivo pa trata esaki. E simposio por tuma lugá danki na e kolaborashon di e terapista di radio (radiotherapeut) di IKN (Integraal Kankercentrum Noord Groningen) dr. J. Szabo i di DAGRA, un empresa farmaseútiko.
    Boluntarionan di PWF ta bishitá tur skol sekundario na Korsou i ta duna charla na Papiamentu i na Hulandes tokante di kanser. Riba inisiativa di dr. H.M. (Bob) Pinedo di VU, PWF ta organisá un di dos simposio ku título ‘Recent developments in the field of the fight against cancer’. Na e simposio tin un workshòp pa enferméranan mará.
    Despues di e konferensha ta introdusí un reunion semanal tokante di onkología den hospital pa dòkternan ku ta envolví den tratamentu di pashèntnan di kanser. Dòkternan di diferente disiplina ku ta enkargá ku e kuido di pashèntnan di kanser ta reuní pa deliberá kada kaso di kanser konhuntamente.
    Den kolaborashon ku Posterij, ta saka un serie di stampianan (eerste dag enveloppen) pa konmemorá. E stampíanan ta ilustrá un bes mas e 7 señalnan di atvertensia; un pintura di un persona ku ta hasi ‘bestraling’, un pintura na okashon di e di 40 aniversario di PWF.
    Ta logra ku na dos filial di MCB (Colon i Saliña) ta introdusí un prohibishon pa huma.
    Ta lansa un kampaña titulá “Korsou kontra di kanser”. Esaki a keda introdusí pa un programa di Union Europeo “Europa kontra kanser”. E meta di PWF ta pa na mundu, den aña 2000 no tin doló okashona pa kanser mas.
    PWF ta keda nombrá pa Radio Hojer pa e premio ‘Rayo di solo’ di aña.

  • 1990

    E promé reunion di pashèntnan di stoma

    Dr. S. Sillé ta organisá e promé reunion pa pashèntnan di stoma na e sentro di PWF. Despues di esaki e pashèntnan mes a lanta nan propio fundashon; Fundashon R.O.S.A.

  • 1991

    di mei: dia anti-humamentu

    PWF i departamento di Salubridat Públiko ta deklará 31 di mei komo dia anti-humamentu.
    Publikashon di e guia ‘Kanser di Prostat’

  • 1992

    Dr. R.Treurniet i dr. A.Saleh ta drenta e tim di dòkternan ku ta duna konseho na PWF. Dor di e programanan di televishon ‘Kibramentu di Silensio’ i ‘Pa kibra e tabú, PWF ta realisá ku públiko mester di hopi mas informashon tokante di e señalnan di kanser.
    250 persona ta partisipá na e kaminata den Punda organisá pa Sedreko.

  • 1993

    promé kordinadó di PWF

    Sra. Batelaan ta e promé kordinadó ku ta señalá PWF pa manehá e sentro. Huntu ku boluntarionan di PWF ta hasi tur trabou di PWF. Ta lanta un fondo di spaar pa tur trahadó di PWF.
    Durante di un marshe di salubridat na okashon di e di 50 aniversario di Wit Gele Kruis, dr. Ackerman i dr, Saleh ta ofresé tèstnan di pechu na personanan ku ta desea. E tèst ta tuma lugá den un bus fiá di Rode Kruis, ku ta stashoná riba e plenchi dilanti di Postkantor kaminda e marshe ta tuma lugá. Esaki ta haña un gran interés serka públiko.

  • 1995

    ta Lanta un asosiashon di pashènt

    Riba inisiativa di sra. Myrna Weiman ta lanta un asosiashon di pashènt ku e meta pa ofresé rekreashon na pashèntnan di kanser. E asosiashon ta haña supsidio mensual di PF pa su aktividatnan.
    Profesor dr. H.M. (Bob) Pinedo ta risibí e premio ‘Josef Steiner Cancer Research Foundation Award 1995’

  • 1996

    PWF ta risibí e rosa di Sint Joris

    Padvinders Antiano a mustra nan apresio pa PWF ku e entrega di e rosa di St. Joris i un plakat di mérito.
    Tin un subida di e kantidat di bishitantenan na e sentro di PWF. Ta trata di personanan ku mester di informashon of ta bin fia artíkulonan manera ròlstul, kama, garoti, a bin tuma un Protésis of ta bin kumpra un BH speshal pero tambe personanan ku ta bini pa por pasa un ratu gezelig hasiendo obra di man of personanan ku ta bini pa konseho médiko adishonal (second opinion).
    Ku yudansa di asosiashon di Diëtistanan Antiano ta publiká un buki nobo tokante di ‘alimentashon ora bo tin kanser’

  • 1997

    dr. F.Scheper ta drenta e tim di konseho médiko di PWF.

  • 1999

    50 aña PWF

    PWF ta selebrá 50 aña di eksistensia. Su Mahestat Reina Beatrix i su Altesa Prins Claus ta bishitá e sentro di infromashon i rekreashon di PWF. Reina Beatrix ta divulgá na e okashon aki un plakat.
    PWF ta hasi donashon di un sistema di plural di televishon i video na e Departamento di Onkología.
    Departamento di Onkología ta risibí dos ‘breast boards’ i un ‘laryngoscoop’.
    E departamento di mucha ta haña 6 kama.
    PWF ta haña un logo nobo: Jan Willem van der Wal ta pinta dos mitar hòmber rondo di e kangreu, e símbulo di kanser.
    PWF ta lansa un kampaña kaminda hòmbernan di 53 aña of mas ta haña konseho por eskrito: esta pa pidi nan dòkter di kas pa hasi un tèst di prostat ku nan i tambe pa rekordánan pa puntra nan dòkter di kas si un tèst PSA ta nesesario.
    Den e kuadro aki a manda 15.000 karta

  • 2000

    Tèst di pechu pa 400 hende muhé

    Dr. M.Samson, dr. D.de Vried i dr. P.Sahoury ta drenta e tim médiko di konseho.
    Dr. A.Saleh jr ta resigná for di PWF despues di hopi aña di dedikashon na PWF.
    Riba inisiativa di de. F.Scheper ta start ku un Proyekto di Antia, kual ta un kolaborashon entre 5 entidat: 1.hospital St.Elisabeth, 2. Vrije Universiteit Medisch Centrum Amsterdam (VUMC) representá pa profesor H. Pinedo, 3.Erasmus Universiteit Medisch Centrum representá pa profesor B. Löwenberg di Departamento di Hematologia, 4.KWF i 5.PWF. E meta di e proyekto aki ta pa sostené i mehorá kuido onkológiko. Ta purba di hasi mehorashonnan dor di drecha infrastruktura, trese programanan pa desaroyo i aktualisashon di e kapasidat dirigí riba dòkternan, enfermeranan i tambe dor di mehora e komunikashon dor di hasi konsulta, pa medio di konferenshanan telefóniko via ku konekshon di satelite, posibel. Asina aki por drecha i fasilitá e konsulta entre e departamento di onkologia i hematologia di e diferente entidatnan menshoná. E resultado di esaki ta mehorashon remarkabel di e kalidat di kuido.
    Tambe ta trese un programma pa stimulá spesialisashon. Sra. G.van Nierop ta bira kordinadó di e proyekto ku ta keda finansiá pa KWF.
    Den konekshon ku e dia anti-humamentu ta logra ku Curinta nv ta krea un espasio spesial pa huma, ya asina no ta huma mas den e area di espera di Aeropuerto.

  • 2002

    'Airu Limpi, pulmon limpi'

    E kampaña ‘Airu Limpi, pulmon limpi’ ta keda lansá kaminda ta krea konsientisashon tokante di e pelígernan di humamentu i e efekto dañiño di emishon di gasnan. E kampaña ‘Kuida bo kueru’ ta ilustrá e daño ku solo ta hasi na kueru na momentu ku esaki keda eksponé muchu na rayonan di solo.
    Ta duna atenshon na kanser di prostat.
    Aandacht wordt besteed aan prostaatkanker.

  • 2004

    Hòmbernan den hunta di direktiva di PWF

    Ku un kambio den e statutanan PWF ta hasi posíbel pa hòmbernan tambe por ta parti di e hunta di direktiva di e fundashon.
    Ta lansa e kampaña “úso di alkohol moderá”. E kampaña ta dirigí riba konsientisashon di e eféktonan dañiño di uso di alkohòl eksesivo.

  • 2005

    ‘Ride For The Roses’

    Riba inisiativa di Rob Blauw ta lansa un kampaña nobo ‘Ride For The Roses’ kaminda 273 siklista ta kore un ruta di 45 kilometet. Na final tur siklista ta risibí un rosa.
    ‘Adikto na morto’ ta un kampaña ku PWF a lansa huntu ku FMA. E kampaña ta dirigí riba hóbennan

  • 2007

    29 mei ‘Viva La Donna’

    Riba 29 di mei ta introdusí e konsepto nobo ‘Viva La Dona’ kaminda ta malkriá e pashèntnan di kanser. Riba e dia aki pashèntnan ta haña un manikür of un pedikür grátis of ta haña un tratamentu di kara of kabei.
    GGD, FMA, Hartstichting i PWF ta uni pa lansa e kampaña ‘Biba salu i NO huma’. E kampaña ta tokante di prevenshon di malesa dor di biba salú i no huma. FMA tin un bus ku ta pasa na tur bario pa duna charla i kontesta preguntanan.
    Refineria ISLA ta ortogá un chèk na hospital pa por kumpra aparatonan pa por trata kasonan di kanser.

  • 2008

    Programa di konsientisashon tokante di tèst di pechu

    Un proyekto piloto pa konsientisa tur pashènt di PP i SVB di e importansia di un tèst di pecho i di mamografia. Ta ehekuta e proyekto pa ocho siman na Tera Kora. Tur siman ta tèst mas o mesnos 100 hende muhé .
    Dòkternan i hospital ta traha huntu pa asina 48 hende por hasi mamografia riba djasabra.
    Ta introdusí luna di ‘sinta blou’ pa duna kanser di prostat mas atenshon. Na juni a organisá un simposio tokante di e tópiko. Mas o ménos 600 hòmber a partisipa na esaki.
    Sentro di informashon ta kumpli 25 aña.

  • 2009

    Pink hero medal

    Freeport Jewelers ta organisá e evento ‘Pandora Pink Tea Event’ i ta ortogá un ‘Pink Hero Medal’ na un boluntario ku a hasi hopi pa pashèntnan di kanser di pechu. Sra. Pilar Sáez de Rosa ta keda eskohí komo esun ku ta meresé e medaya.
    PWF huntu ku GGD, FMA i Curaçaose Hartstichting ta lansa e proyekto ‘Teen keep it clean’. Hóbennan entre 13 pa 18 aña ta haña informashon tokante di e pelígernan di humamentu i uso di droga i alkohòl. E hóbennan mester kompartí e informashon ku nan a haña ku otro hóbennan. Riba e dia di klausura di e proyekto, 650 hóben a bini huntu pa mustra kiko nan a siña pa medio di teater, músika of baile.
    Direktor di MCB sr. Lio Capriles ta ofresé pa remodelá e edifisio na Scharlooweg. E ta hasi esaki den kuadro di e di 25 aniversario di PWF i komo muestra di apresio.

  • 2010

    Fundashon Prevenshon ta habri

    Fundashon Prevenshon ta habri su portanan. E ta e promé sentro di investigashon pa kanser na pechu. Esaki ta e promé proyekto ku sr. Lio Capriles i profesor dr. Bob Pinedo ta hasi huntu ku ta den interes di salubridat na Korsou. PWF ta yuda e fundashon nobo ku dunamentu di informashon na pueblo. E ta hasi esaki dor di enfatisá e importansia di detekshon di kanser for di trempan i tambe e importansia di hasi mamografia.

  • 2011

    Fonds pa kanser di mucha

    PWF ta sera akuerdo ku Ronald Mc. Donald House of Charities i Chance for Life pa lanta un fundashon nobo: Fundashon di kanser pa mucha (KIKA). Un di e promé intervenshonnan tabata e fasilidat di Ronald MC.Donald den St.Elisabet Hospital pa mayornan di pashèntnan yòng di kanser, por keda drumi huntu ku nan yu.
    ‘Dare to wear a beard’ ta un inisiativa di Rotary Club Willemstad kaminda hende hòmbernan ta krese nan barba pa un luna largu pa asina rekoudá fondo pa un bon kousa.
    No ta kolekta sèn so, pero tambe ta traha riba konsientisashon di kanser na prostat.
    PWF ta forma parti di e tim multidisiplinario di ‘palliatieve zorg’. E komishon ta konsistí di diferente profeshonalnan ku ta aktivo den sektor di kuido manera onkólogonan, radioterapistanan, Wit Gele Kruis i Fundashon Hamiëd. Nan ta traha huntu pa mehora e ‘palliatiezorg’.

  • 2012

    Kor di PWF

    PWF ta lanta su mes kor ku ta konsisti di klientenan, sobrebibientenan, nan famia i boluntarionan.

  • 2013

    Obra teatral “Na pechu”

    Sra. Anneke van der Gullik ta bini ku e inisiativa pa trese e obra teatral Hulandes ‘Ontboezemingen’ na Korsou. Nan ta konsiderá nan mes komo un grupo ku ta duna informashon na un otro manera: den e forma di teatro. Pa e obra por tin un alkanse grandi bou di pueblo i pa por pasa esaki na e barionan, e mester wòrdu tradusí na Papiamentu. Sr. Roy Colastica a keda enkarga ku e ehekushon di e proyekto ‘Na pechu’.

  • 2014

    65 aña PWF

    Profesor dr. Bob Pinedo ta risibí e prestigioso premio ‘David A. Karnofsky Memorial Award’ otrogá pa American Society of Clinical Oncology. Dr. Pinedo ta keda rekonosé komo pionero den e area di kanser, pa mas spesífiko den area di investigashon.
    Pashèntnan, boluntarionan i trahadónan ta presentá un obra teatro: ‘Na dòkter’
    Komo rekuerdo di e di 65 aniversario di PWF, C Post ta introdusí un serie di stampia ku e tema ‘ Fight against Cancer’. E serie ta konsistí di 6 stampia ku ta ilustrá e típonan di kanser di mas komun na Korsou.
    Eksposishon di potrèt di hende muhènan ku a pasa den e proseso di ‘mastectomie’ (amputá pechu pa motibu di kanser). Fotógrafo Ellen Spijkstra a saka pòtrèt di e torso di algun modelo sin mustra nan kara. Nan ta keda anónimo.
    PWF ta organisá un seremonia di rekonosimentu den seno chiki pa esnan ku a hasi hopi den e lucha kontra di kanser. E promé premio ‘Diane Henriquez’ ta keda ortogá na sra. Henriquez pa na e manera aki yama danki pa e esfuerso grandi ku ela hinka den PWF. E premio ta konsistí di un sertifikado i un bòrspèl di oro di e reliëf di dos man ku ta drenta otro. E bòrspèl ta simbolisá e hende ku ta duna e otro hende un man.
    E di dos premio Diane Henriquez ta bai pa profesor Bob Pinedo komo rekonosimentu i muestra di apresio pa tur loke ela hasi añanan largu pa Korsou i humanidat en general. E preimo Diane Hneriquez lo keda ortogá kada dos aña.
    E selebrashonnan di aña ta klousura ku un simposio riba area di onkologia titulá ‘Kanser Ayera, Awe i Mañan’. E simposio ta dediká na públiko di Korsou ku diferente dòkter, spesialista, trahadó sosial i pashèntnan komo presentadó.

Kon nos por yuda bo?

Laga nos sa si bo tin pregunta, si bo ke laga un remarke atras of bo ke mas informashon

“Harimentu ta un parti importante di e proseso”

Marly Oosterhof
Apliká na nos boletín di notisia mensual
Keda na altura di tur desaroyonan den nos orginashon

Copyright ©2019 PrinsesWilhelminaFonds. All Rights Reserved